COMO PASADES!

A intender su cantu ‘e sos puzones
frorizande sas dies beraninas
mi nde pesan pampadas genuinas
de allegria in totu sos chizones.

Su andare continu de sos rios
cun murmutos selenos, sonnigosos
paret ch’intonet nìnnidos festosos
in su silentziu ‘e sos campos frorìos.

In custu regnu de prantas e frores
totu m’ammagiat, mi dasso ‘entulare
da sos alientos de terra e de mare
ammescurados a milli colores.

Ma intendo su coro in avolotu:
custu silentziu m’illebiat sa mente,
ma faghet falta sa tzarra ‘e sa zente
chi a signales de vida dat su motu.

Ue sun cuddos cantos pastoriles
intonados in antigas pinnetas?
Ue sun cuddas rimas de poetas
cando fuin abitados sos cuiles?

Ei cuddos albudos pedditzones
chi an postu sas pedras subra pare
e t’an fatu nuraghe diventare
sena cimentu, rena ne matones?

Ue sun sos antigos abitantes
de cuddos “furrighesos”* rocalzinos?
Ei sos restos de sos inquilinos
chi an prenu sas tumbas de zigantes?

Antigos e pomposos monumentos,
atera tziviltade azis connotu!
Bos at su tempus, a dispetu ‘e totu,
afoltigados cun abbas e bentos.

Como godides su giustu reposu,
dae matas de rù inghiriados
e retzides, si sezis fortunados,
sa visìta de calchi amantiosu.

Como pasàdes! E nessi a betzesa
sezis s’ammiru de sa zente ‘e fora
e cun orgogliu mustrades ancora
de sa Sardigna valore e bellesa!

*Furrighesos = domus de janas

  Antoni Piras