Compare ispera
di Mimmia Soro

Caru compare in s’altare mazzore
apo preghende una candela atzesu;
apo fattu sufraggiu a su Segnore,
a sos Santos vicinos e atesu,
si su pregare meu hana intesu
gia che det isparire su tumour.
Chi Bos tocchet s’issoro santa manu
e torredes che prima allegru e sanu.
Compare isculta e pone mente
a totu su chi narad su duttore,
siedas puntual’e ubidiente
si cherides sanadu su dolore,
de Bustianu su risu innozente
cun sos ojios velados de amore
bos siada de sullevu a tantu istraziu
pro godire sa vida a coro saziu.
Pensierosu e cummossu m’arreo
meditende in su chi est capitadu,
sa libertade abusiva mi leo
de citare unu Santu veneradu,
Santu Tomas a nadu:no bi creo
Ca no l’hapo ne bidu e ne toccadu.,
Poi narad tocchende cun sas manos
Sggettos a sos males sun sos sanos.
Unu riccu signore miscredente
possidente de amas e terrenos,
mai cretende in sos males anzenos
pssaiada sa vida allegramente,
una die su male,de repente
a sa salude istringhet sos frenos,
e umiliadu das a male feu
cred’in su Santu e invocad’a Deu.
Cand’unu crede cun devozione
mai solu s’agatad’in viaggiu,
ca de s’Onnipotente riccu omaggiu
li faghed de guida e lampione,
si narad bene calchi orazione
sa preghiera l’imponet coraggiu,
e sis a preghiera est bene nada
mai solu s’agatada in s’istrada.
De s’omine sinzera cale amiga
sa preghiera fidele cumpagna,
semenende su ranu in sa campagna
pregat chi crebed’e boghet s’ispiga,
Santu Isidoro in sas teras d’ispagna
Teniada cumpensu a sa fadiga,
e ca fidele pregadu hada tantu
fidi massajiu e diventadu est santu.
Mantene s’isperanza bia in coro
sa volontade fissa sempre in mente,
sa preghiera che a Santu Isidoro
de cunfortu bos said veramente,
sa salude bos torred fiorente
ca chi la pagat no s’agat oro.
Pro contu meu deo prego e creo,
Prego a bois su chi mi prego deo.

(Olanda)