Connosco logos.

Connosco logos
inue b’at solu pedras
e rocalzos e, nues,
e in mesu
e tra issos,
solu ’entu,
chi sulat inchietu,
a signalare s’incantu,
chi alimentat
cun nuscos e sonos
chi da-e basciu trazat,
e nde pigat,
e misciat chentza pasu,
pro chi bene s’impasten
e si fundan
in s’intragna de ogn’essere vivente.

Connosco logos
chi mente e coro, pasan
e cunfortan,
che diliga manu
chi carignat e promitit amore;
o che un’anninnia armoniosa
chi bantzigat s’anima
in bratzolos de ’entu,
e drommit penas
e pensamentos,
e pro un’iscuta,
mamentos infinidos,
rendet a s’anima
su donu immortale
e pretziòsu de sa paghe.

Connosco logos
inue su chelu tocat sa terra.

Franco Piga (Romana ‘SS’)
Cabidanni 2006