Consizos a s'amigu Chicheddu
di Luigino Becconi

Chicheddu, mi connosches da ora
chi sempre so istadu bonu amigu
e bon’amigu cherz’esser’ancora.

So isposadu, e mi sent’in’obbligu
De ti lu poder dare unu consizu
Ca non ti cherzo ider’in castigu.

A isposare nde tenes disizu
E dae mè pretendes unu parrer?
Ti lu do prontu, ca l’app’a manizu:

A isposare so est’a lu narrer;
bisonzu de pensare seriamente
prima chi a s’altare tès cumparrer.

Naras ch’innamoradu veramente
Nde ses de cussa bella signorina;
e chi furadu ti nd’hat coro e mente?

Mi…chi su marimoniu est ruina;
sos chi l’ahan fatu si nde sun pentidos
cand’han’ischidu bene is’est femmìna.

Medas innamorados si sun bidos
Ch’han fattu tanta gherra pro s’amorre;
isposados si sun, ma sun partidos..

Sos chi sun paris, suffrin cun dolore
Sas penas de s’inferru, su turmentu
pro salvare famiglia e onore.

Si cheres viver felice, cuntentu
Pone su matrimoniu a un’ala;
Ti lu naro ca tenz’isperimentu.

Su esser’isposadu est cosa mala
Ca non rides pius, ne ti disvagas
Prite sa rughe la giughes a pala.

Brigas cun’issa cando t’imbriagas
E ti frastimat senza riguardu
Cun carignos d’amore non l’appagas.

Mi chi non fettas comente su Sardu
Ch’invecce de pensare prima faghet
Epoi si nde pentit ma est tardu.

Si non li leas su chi li piaghet
Tich’imbolad’a terra da su lettu
E cussu certu non ti sodisfaghet.

E tue, poveritu; ses costrettu
De ti chircare lett’in ‘atterùe
Si nò dormis in tera mansuettu.

E si pro casu bi lu faghes tue
Ti faghed’un iscandalu nieddu
Chi luego che l’ischin’in tottùe.

Tue chi sale giughes in chelveddu
Frastimas fintzas s’ora e i su die
Chi l’has post’in su poddighe s’aneddu.

E si non bistas attentu b’est chie
Ti sostituit cun facilidade.
Tando sas culpas sunu sott’a tie.

Si la proibis de sa libertade
Faghet domand’e sepparazione
E ti piantat senza piedade.

Tantu, sa legge li daet resone;
si la domandat prite t’hat lasadu
rispondet (ca est troppu gelosone).

E tue restas solu, abbandonadu;
issa torrad’e faghet dae nou
s’amore cun su etz’innamoradu.

Si tenes calchi fizu, d’esser tou
Non t’illudas, ca non nde ses seguru
L’ischid’issa chì est su babbu sou.

Tue de cussas cosas a s’iscuru
Nde ses ch’ancora non bi ses in mesu
Però…est gai Chiccu, crede puru.

Non creo chi nde, restes tant’offesu
Pro ti narrer, non fettas s’acconcada
Tantu tontu non ses, già m’has cumpresu.

Sa gioventude tua, ruinada
Non cherzo ider ca mi faghet pena
Est mensus iscaddare in pedd’anzena
Lass’istare sa rughe a chi l’hada.

Olzai