Consolu
di Domenico Angelo Fadda

Ite sunt sos sentidos ch’ap’in coro
chi dies aumbradas so passende
cun nues atturadas chi sunt dende
a lamentos sas peleas issoro?

Accolla s’abba, millu su tesoro
chi fia dae su chelu isetende,
beneita sa terra ch’est retzende
sos buttios ch’in laras assaboro.

In su mudine non m’intendo solu
e pesso, pesso ma sa lughe ebbia
s’est in aeras netas accherada

in s’animu po mi dare consolu,
a iscaldire sa pessone mia
de su sole mi bastat un’oiada.

Menzione d’Onore: 3 Ediz.premio poesia “S’ISCIAREU” - FLUSSIO dicembre 2010