Contos de foghile e de computer

di Benito Saba (2004)

« Mare biaittu sutta s'iscalone
de oro chi su Sole falat lughente,
lumenosu triunfante, ammasuleri
a sas Undas de sa temporada,
tucchende a sa jaga de amatista
de sas Roccas ardentes ammajadas.
Su Lentolu 'e Nue lebiu, accudidu,
biancu doradu rosadu isplendente,
isettat su cumandu 'e su 'Entu
de imboligare su mere potente
pro su sonnu in sa notte ch'est benzende.
Sa Marettada lenta in s'oru 'e mare
mazat, s'attappat, minutos contende
de s'intrinada gloriosa solenne
de su Re Imperadore d'Oriente
chi est intrende in su Rennu d'Otzidente,
lettu mannu cun mantas affianzadas,
inúe drommit chietu, fizu 'e mama!
Su portale 'e fogu sun abberzende!
Sos Montes tott'ingiru che nuraghes
sun armaritzos rujos minettosos
e defenden sa lácana balentes
dae sos Diàulos de s'ispéntumu iscuru:
s'áidu est affacca a s'essida 'e ponente!
E sas Janas ermosas… ».

De giaja cara sos contos a sero!…
Semper l'ammento, antziana, no… antiga…
ma… guasi 'énnidu so a s'edade sua!…

Una contanscia hoe narrer chería...
matessi giogu torra m'an pretesu!
Assentados ainnanti a su computer,
atzesu che foghile e cun sa 'oghe!,
mudu devo ammustrare a netta mia,
de chimb'annos lómpidos gianteris,
sa paristoria, in figuras truncadas
e una ciarra crástula isteniada,
de s'atzudu astronauta giapponesu
chi arriscadu s'est in galassia aliena…

A manna, netta mia
de custu giaju sou s'at a ammentare?

Benito Saba

Questa poesia ha conseguito il PRIMO PREMIO al XIX CUNCURSU DE POESIA IN LIMBA SARDA F. P. TILOCCA - Setzione Poesias chene rima - OSSI - 2004