Ite t’est sutzedende, o coro miu?
Tue che fis già mortu e sutterradu,
E proite de nou as palpitadu,
A corfos mannos, che cando fis biu?
Nò, nò! Abarra in tretos tuos!
Tue no ischis prus it‘est amore!
Non podes cancellare su dolore
E annos de ispinas e de ruos!
Non mi nerzas chi ses innamoradu!
Ca non ti creo, mi, pro cada cosa
B ‘est unu tempus. Poi pr’una rosa,
Chi no as mai bidu nen toccadu?
Solu pro ca intesu as una oghe,
Bella, chi drinnit comente campana?
Ma chi ‘est milli chilometros lontana...
Assumancu si fid’istada innohe!
No nò coro miu, torra in trassa,
Non ses pius piseddu. Ite ti crese?
Pensa chi betzu e malesanu sese,
E non podes pius andare cassa.
No est ora defagher balentias,
Ca est so[’una nue passizera!
Est un ‘illusione, una chimera!
Est menzus chi importu no li dias...
No coro, mi deves ascurtare,
E no m‘ammentes cuddu ditzu sardu,
Chi narat: “No est mai troppu tardu”
Chi b‘est semper su tempus dè amare.
Ja l’isco chi l’istimas e la bramas,
Chi a di’e a notte la disizas.
Però ch’est tardu coro! Non t’abizas
Chi invanu la chircas e la giamas?
Eo tap ‘avertidu coro meu
Ca ti cherzo evitare unu dolore...
Però si credes chi siad’amore,
Siat fatta sa volontade e Deu...