Corvuleddas de vasos
di Salvatore Ladu

Mai, prus lughe crara
Appo vidu in sa cara
De s’isteddu ch’in coro m’at feridu
Cantu li lego in chizos
Mi bullizat disizzos
Chi prima de la idere an drommidu
Mad’ispratu che frore
Intro su pettus disizzos d’amore.

Su chelu in s’oriente
In cunfrontu est niente
Nono chi no est sonnu, so ischidu.
Imbriagu ‘e nuscos
In sos fozidos buscos
Dio cherrer cun issa fagher nidu
Cale menzus recreu
Cun su fruttu ‘e s’amore suo e meu.

Nigheddas duas trizzas
Suas, m’intran che frizzas
In su coro, ch’aspettat de li dare
Mancari a fura a fura
Un’ojada sigura
Cun cussas prellas in colore ‘e mare
Pro sa lughe chi dana
Duos rajos de sole in sa ventana.

Preparo una cantone
E sutta su balcone
Cando su che est nettu e cad’isteddu
Lughet solu pro issa
Li fatto sa promissa
Chi l’amo tantu e li porro s’aneddu
Lat piscadu in sa rena
De mare cristallinu, una sirena.

In uricras li naro
Chi pro issa preparo
Corvuleddas de vasos a s’iscusa
Si sos coros si junghen
Ca disizzos azzuinghen
Sas meligheddas ch’ada intro sa brusa
De linu trasparente
Mi faghen che barduffula sa mente.