CROCE O MEZZALUNA

1

O Franziscu Zuseppe Imperadore,
narami si ses rughe o mesa luna,
pro chi t'has cambiadu tott'indu'una
su coro, e de sa faccia su colore?
Nara si t'est Gesùs su protettore
O su lussuriosu Maometto,
s'in mesu de sa virgines ti ch'etto
o a cara 'e Deus ti presento?

2

Trattende male a Trieste e a Trento,
non podes esser veru cristianu!
Chi t'has infultu 'e sambene sa manu
Dai sende minore minde ammento,
e in su dimandare mi bistento,
a bider si ses Cristos o Barabba,
si t'hana battizzadu intro 'e s'abba
o ses chei su Turcu circoncisu?

3

A Ponente o Levante lu has su visu
pro mi lu narrer ti atto marranu
o puru 'e duos frontes ses che Gianu
e figuras Inferru e Paradisu?
A cale parte ti che dezisu,
prestu ispiega senza zirimonia,
ses tue Sobieski de Polinia
o su Califfu ch'isse hat cattigadu?

4

Ti ses fidele a Roma cunservadu,
o l'has dae Bizanziu sa paga,
cun sa rughe la portas una daga
o de iscimitarra ses armadu?
O ti ses tott'ind'una variadu
sa pedde oltulendedi a s'imbesse,
preferidu 'e su mundu has s'interesse
e pro su corpus s'anima has perdidu?

5

Ti ses a sos cumpagnos reduidu,
chi fin dignos de te cumbessu cane,
e mancat a sos populos su pane,
chi che alga in carrera che has frindidu.
Cun su male chi has fattu ses bennidu,
a ti connoscher su chi fis bastante
su diadema cun sa righe in punta?

6

Rejone haja 'e fagher sa pregunta,
ca mai 'e s'infelize has tentu dol,
e fatt'has veces de cincirriolu
ch'est sorighe e puzone pro aggiunta?
O virgine Maria in Chelu assunta,
e ite tardas a ti vindicare,
s'a tie puru hat devidu ingannare
cun transas viles de un'impostore?!

Giuseppe Calvia Mores - giugno 1916