Cuju ses?
Soe itzu de su entu ‘e susu
chi cando sulat pulit su mare
e che innedat s’anneu de s’istade.
E tue cuju ses?
Soe itzu de duos isteddos
sont a miliones in su chelu
ma sos mio sont sos prus luchentes.
E tue cuju ses?
De su sole e de sa luna.
Si sont zoviaos sero sero
e m’ant dau su mentzus chi aiant :
su sole sa ‘orza
sa luna s’istima.
E tue cuju ses?
Soe itzu de una zenìa
de seculos de patimentu
de chentu mammas
e de carchi babbu.
Pesau in praiches assoliàs
e in s’umbra de padentes
in ue s’abba est vida
e sa disamistade morte.
Soe itzu de una terra beneìta
chi m’at sinnau s’anima
chin custa limba meravillosa
e m’imparat dae sempere
sas novas de sa vida.

in musica :

https://www.youtube.com/watch?v=W9XRdHyBkWU

Cuju sese: testo di Vincenzo Pira, musica di Gianni Sagheddu