Istanotte,
sa luna s’arpilat
in sa cortes
de unu chelu sonnidu…

Fundales iscoloridos
de mudesa mi ferren,
intro custu apposentu
‘e sa solidade…
Tocchedan de ‘iddia
sos mermos mios

In s’atta ‘e su caminu
inghiriosu ‘e s’intrighinu
sobran
anneos, bèmidas, ingabbos
pro mi sighire chei s’umbra mia.

In su caminare lentu
‘e passos inchelados,
sos alluinos s’allizan,
s’istudan sas chimeras
e restan iscrettidos
sos pessos mios…
ma sa mente ninnat ancora
renchènnidas de unu tempus coladu
e mi murmuttan,
cun d’unu filu ‘e oghe tremulosu
mazines coloradas de vida,
chi m’iscaldin sos bisos
e columan de lughe noa
sos pessos anneados.

E tando,
cun s’agu ‘e sas dies,
chirco ‘e recramare, ancora,
sa vida
cun filos de ispera.

Mentzione de onore in sa XXXII editzione de su Premiu de poesia Antoni Andria Cucca setzione versos isoltos, Ossi 15 de Làmpadas 2019.