Curren Illacanados
di Antonio Piras

Cùrren illacanados
sos pensamentos mios
che abbas de sos rios
passizeras.

Bòlan in sas aeras
che puzones famidos
chi no ischin, bramidos,
ue andare.

Nàdan in custu mare
de abbas truvuzadas
isetande annadas
sena gherra.

Rùgan tota sa terra,
forrògan che sirbones
po agatare chizones
de allegria.

Ispèran torret bia
s’istima, s’onestade,
sa paghe, s’amistade
in totue.

Prègan chi finas tue,
oe malintragnadu,
cras sias basadu
da s’amore.

Chèren chi leet lugore
dogni coro bujosu
e chi torret in gosu
su patire.

…………………..

Cand’est chi den finire
de filar’e de tesser?
E cand’est chi an’esser
asseliados?

Cùrren illacanados…