Cuscenzia mi scarràgghj li difètti
chi cun tecu no pòssu più cuà,
mi cinghj e bàtti lu còri m'appretti
mi gjru in tùndu e no sòc'und'andà.
li 'izi capitali chi sò sètti
canti 'olti mi li fài ammintà?
No attizzà lu focu accèsu in mècu
chi brusgja gjà, paldonàmi ti prècu.

M'arrec'un'ambulòni di bon vìnu
cussì ci mantinìmu in alligrìa,
vidarè chi ci cambìgghja 'intìnu
siddu mi fài bòna cumpagnìa.
Tinni stai sirèna illu me sìnu
pa no iscatarà chist'almunìa,
lu 'olaria pàr'abàli sòlu
dapoi torru a fà lu bòn fiddòlu.

Dammi cunsòlu, no fà l'ammusciàta
lu socu chi mi 'òi sèmpri bè,
cuscenzia cara sè innammuràta
un'alta meddu pènsu chi no c'è.
Mi piaci candu sè rassirinàta
candu dicu lu chi voi intindè,
mi dèi dà cunsìddi pa l'affètti
pal piccati chi dècu cunfissà.

Cuscenzia mi scarràgghj li difètti
chi cun tecu no pòssu più cuà.

Menzione d’onore al “Viniscola” 2014