Cussas litteras
di Vincenzo Pisanu

Cussas litteras
chi no t'apu mai scrittu
chi mai hapu impostau
e no ti funt arribadas,
ddas tengu ammazuladas
istrintas e acapiadas, acuadas
ind'unu furrungoni
in su costau.
E nemus ddas bit
ca nisciunus scit
itta est a ti scriri
asub'e follius e follius de bentu
aintr'e cussas rigas finis finis
chi no acabant mai in pensamentu
comente lòmburu mannu de tramas
de disigiu, chi lompit finzas a celu
e prus a fundu puru de is isteddus.

In cussas litteras iscriu tot'is fueddus
chi in atera manera no ti pozzu nai.
Litteras chi no impostu
e chi no ant'arribai, e a is calis tui
mai has a respondi fueddus.
Litteras comente arrogheddus
de prumu surdu e fridu chi intrat
a pimpiridu steressendi e abbruxendi,
litteras chi ti seu scriendi
di annus e annus, imboddicau in pannus
di annungiu e de dolori.

Litteras di amori chi no hap'a impostai
e chi tui no as a arricìri
e no has a lìggiri mai.