Custa no est vida
di Larentu Pusceddu

Cada arborinu
intendo cantare a boche lena
unu massaju allepizadu
che un'ispica ruinzada.
Cantat a denotte pro more de su die,
unu die anneuladu de alinos istraccos.

Sa fadica la sinnalat
su tirriu de sas rodas male untadas
de su carru lenu e pesante che sa morte,
amica de su tempus,
chi osserbat donzi die,
sa vida chi nos lassat,
chi fuit dae sa carena addolorzida
dae su triballu de iscraos.

Custa no est vida
si s'unicu recreu
est unu cantu istonadu,
est su binu buffadu in cumpanzia
pro ismentiacre sas umbras,
est s'amore godidu impresse,
a cua e a s'iscuru
e su restu est dolore,
murinas dies,
toccos de morte.

Eppuru sichides a gherrare, massajos,
arande sa terra predosa e tosta,
ispilinde sas erbas malas,
cun s'ischina a su bentu e a su nie,
isuliande puzones airados,
messande e triulande conca a sole,
donande a sa terra sisida
s'abba de su suore.

Custa no est vida
si sos ranos dorados abarran a muntone
in sos isostros umbrosos
de sos meres ingordos.

(Inedita)