Custa note
di Metodio Dalu

Custa note in su sonnu ti apo 'idu,
tenias chimbe frores delicados:
fin totu bellos, meda profumados
ma unu, azigu, pariat ingroghidu.

As nadu: cussos frores son sos fizos,
frutos galanos d'amore perfettu,
ma unu est naschidu chin difetu
e pro isse son tantos sos disizos....

Sa Natura m'at cherfidu servire
calighes de dolore e de fastizos
pro custa criatura isfortunada.

Chin tantu afetu l'amus carignada
totus unidos chin sos mannos fizos
pro afrontare umpare s'avenire.

(Torpè)