Ahi sa rundineddha ‘e primu volu
chi m’astringhes sa manu in sa chillìa,
mi carignas pedinnemi cossolu
ma no est po ti dare sa zizìa.
Tottu vas a prapare ahi su dolu
e t’ammudas a canno b’hat proghìa.
Ahite custa vida a coro duru
t’hat cundennada a bier a s’iscuru!

A tive n’est privada donzi cossa
e pranghenne a Deus bi lu nassa.
Po iscriere e legher no est cossa
galu no-lu cumprennes su chi hassa.
Po su profumu connosches sa rossa
a mama acurtzu Deus mi-la dassa,
ma-in s’iscala prapas su gradinu
ti moghes ascurtanne su terrinu.

A tive mennuleddha thucorada
in sos chizzos velados m’has iffustu,
non cherjo chi ti vias iscorada
ti lu potho contare tottu custu?
Intro su coro meu t’is cuvada
ca ses un’anzoneddha e no est zustu
e-a sa vida l’erepo pedidu
de t’azudare in su chi m’happo vidu.

De t’essere a costazzu chin su ventu
isperanne po carchi meichina,
de ti darepo ortza e su talentu
si ti narana miala mischina!
Canno ti pranghes dae s’iscarmentu
jeo prango chin tive sa rejna.
Ca mai l’happo vintu su dolore
chi vies tue po s’iscuricore.

Primo premio - Flussio 2013