Dai chentu camineras
de Maurizio Faedda

Benit dai chentu e pius camineras
melodiosa sa sarda cantone
cumposta in versos de chentu maneras

che faineri in mànigas de ‘entone,
cun su sentidu, mùsicu e cantore
cosin in rima ogni chistione

si han su coro sididu ‘e amore
làgrimas caldas lis falat in chizos
ingullende salia ‘e rantzigore.

Paret ch’han un’a s’àter’assimizos
s’est chi sas sortes si chintan de dramas
e-i sas feridas no han allibizos.

Belu ‘e disisperu ‘ettan sas amas
da’ intro su pasciale in sa tanchitta
ch’ispiridende sun tottu sas bramas.

Su fragellu ‘e sa limba biaitta
chi che ‘occhit s’arvegh’in sa raina
chen’ispidu ‘e fogu e leppa fritta,

in sos porchiles sa peste suina
e intro su ‘acchile ruet s’ ‘acca,
su ‘inu buluzadu in sa chentina.

Ma intrat s’atza in sa caren’istracca
a su cantu ‘e su puddu a manzanile
a dar’interru a maladia macca,

imbrajada ‘e fogu in su foghile,
chitto pistende su pan’untinadu
cando sas grinas trappan su giannile.

Muntu in sa mandra est già su madrigadu
e peri sas costeras sa laghinza,
in sas labias su latte giagadu.

Isbarratzadu ch’hamus runza e tinza
torrat su bon’umor’e-i s’allegria
ciulan sos puzones in sa ‘inza.

Pigan Cubeddu, Murenu e Caria
a festa manna ‘e su santu patronu
e intriscan sa gala ‘e poesia

accumpagnados dai su cunsonu
lestra che ‘ogan s’intragna guvarda
altziend’una tatza ‘e ‘inu ‘onu,

in istios chi siccan sa prunarda,
in anderas de paza in sas aeras
melodiosa sa cantone sarda

ch’ ‘enit dai chentu e pius camineras.

Menzione particolare a Burgos - 2^ edizione Premio Adelasia di Torres