Dami una manu

Annos e annos c'hat coladu certu
e zeo gal'in chirch'e su siddadu
cuddu chi galu, no hap'iscobertu.

Ma chirc'ancora, non so isporadu
ca in cuss'isperanz'ancora vivo
c'agate su chi sempre hapo chircadu.

Oh! poesia; nara cando arrivo
a cuss'intentu, a ti poter basare?
Beni si cheres; chi gia non ti brivo!

Anzis, s'aparis benz'at'abrazzare
de bonucoro e, a brazzos abertos
c'hapo disizzu de ti carignare.

Lassa pro un'iscuta, sos espertos
faghe cliente tou a mie puru
no m'abbandones in logos inzertos.

No mi lasses aparp'in tant'iscuru
gia bides, chi chirchende so sa lughe
guidami no hapas coro duru!

Guidami, a sa meta miche jughe
Chi pota ider unu sole nou
non m'abbandones a brazzos a rughe!

Ca si m'azzuas su merit'est tou
e tenes tando, unu client'in prusu
chi non prus chircat pilu, in intro s'ou.

Lassa de te chi pota fagher usu
e chi ti pota crescher a fiancu
che unu frore de sa chima susu.

Tue; tue, azuami a su mancu
c'agate in presse su siddau meu
cuddu chi chirco, ca est puru e francu.

Ca penso ch'est biancu sena neu
e lu so dai zovanu chirchende
ca est de milli versos, su troffeu.

Troffeu ch'in su mundu est triunfende
chin versos caros, chi deghidas rimas
rimas chi m'ana e, mi son carignende.

Beni, avanza, pro chie ti frimas?
Dami sa manu, acumpanzami tue
chi ponza passos, tra frores e chimas.

Non pretendo chi m'hatas a sa nue
ma solamente una man'e azudu
Ben'ajo! Non mi lasses goi mudu.
Sena faeddos; e a s'arz'e rue.

Giovanni Boccoli (Posada)