Ti ch’ apo a gighere
addae... in cussorzas sulenas
fizu meu, cun bestes de allegria
ue su chelu ancora
no at dadu s’ annuada.
Amus a currere
a columu de ispaju
subra caddos cun coas allistradas,
lieros de nos rucrare sos pessos,
car’ a padros de sole
e tirrios de rundines
a cuncordu ‘e cantu.
Cun alas de durcura
t’ apo a asciuttare sas lagrimas,
pro s’inghenia ‘e custa Terra
sizida in s’ astraore ‘e unu mare airadu.
Albeschidas de lughe
nuscosas de abbrazzos
de fiores noales,
t’ an’a caentare su coro ‘e su cras,
bantzighendedi sos bisos.
Amus a essere torra una familia,
unu siddadu ‘e ameddos …
e a cor’ in manu,
t’ apo a istrinare
briones de ispera
de semenare subra
sos sulcos pedrosos de su mundu
pro los alentare
in terras crionzanas de vida, de paghe.

Primo Premio - "Premio Quartucciu" Quartucciu 2016