De sa famiglia LADU locu est custu,
duas sorres 'e frade magistrau,
a sa Comuna in donu l'han lassau,
e s'est apertu su nov'e Agustu.

Pustis de battor meses de tribagliu,
pulinde e boccande a campu cosa,
e oje zente meda curiosa,
osservat totu s'issoro bagagliu.

Su tribagliu s' est fatu a bonucoro,
pro chi costau er mannu sacrifiziu,
hana lassau s' ortu pro s' ospiziu,
e su chi v'est'inintro it tot'issoro.

lntrand'a drest'accattades s'istanzia,
attentamente la podider viere,
codices b'ada e macchinas d'iscriere,
libros e quadernos de importanzia.

Poi essind'e arzand'in s'iscala,
a comente podidese osservare,
sun sas fotos' anticas de Gonare,
e sighinde arribadese a sa sala.

Uve notades'unu cassione,
cant'a innanti sa macchin'e cosire
e sos sestos pro accher su vestire
unu bellu divanu in su salone.

Sa credenza, cumos'ispecchiera,
vi sun sas tassas cun sos cicherones,
pinta pane, tassitas' e tassones
sun tot'oggettos de antica era.

In cochina una mes'aparizzada,
piattos e gurteddos bi hat parizzos,
gruchettasa cuglieras'e pannizzos,
sa sal era e un' ampulla pintada.

Poi a curzu a sa giminera,
sun dingalu sos usos pro sa lana,
sos teppenes pro filonzana,
v'est su brasciolu e i sa piattera.

Su brasieri accattades puro,
e carchi tenda ata in su telarju,
e canisteddas pro ponner charju,
e sa credenz'attaccadd'a su muro.

Essinde torrain sa sala colades
pust'aer bidu cussu patrimoniu
un' attestadu b'hat de matrimoniu
de-zi' Antoni LADU si osservades.

Pompiade ch' est totu postu in mostra,
e d'est'una ricchesa cust'abìtu,
arzand'in sas iscalas de granitu,
fotografias b'at de zente nostra.

Intrad'adresta ch'est'unu tesoro,
duos lettinos b'at chi tando usavana,
Peppedda cun Gonaria corcavana,
ca id'in cue sa camer'issoro.

Vi sunu sos letzolos ricamaos,
supra vidides duos capitzales,
iscrittas sas'issoro iniziales,
vindad'o no de istar'ispantaos?

Supra de su lettinu ben'istesu,
osservade su rusticu est custu,
sor bottinos, su odde, e i s'imbustu,
sa camisa pintàd' a cor'imesu.

Cun duos comodinos'a fiancu,
pro si ponner sa roba lis serviana,
edonzi notte cando si dromiana,
de su rosariu, non nd'acchian'a mancu.

Non nd'isco si usavan sos cristallos,
ca sa domo esistit dae meda,
ma vat fardettas de tibe e de seda,
espostas cun sas brusase isciallos.

Vat galu cosichedda in cantidade,
chi totu non resesso a elencare,
cust'aposentu lassamus'istare,
de vronte vest s' istanzia'e su frade.

Uv'intrande notamus su ritrattu,
vest pizzinnu e cand'est'anzianu,
cun su chi l'occurriat fitianu,
in camera 'e lettu da onzi lattu.

In su cumò aviada sos correddos,
pro che ponner'inintro su tabaccu,
nond'isco si pippavat meda o paccu,
vest su pacchetto de sos zigarreddos.

Un'iscatula e totu s'occurrente,
cun sa fiala pro carchi puntura,
ca si aviat bisonzu de cura,
sar medichinas juchiat serente.

Una giacca de camer'a bestire,
e in su comodinu sos occiales,
e codices civiles'e penales,
silos leghiat prima e si drornìre.

Fit Presidente de su Tribunale,
e de Corte Appèllu Magistradu,
vest sa divisa de cand'sordadu,
e cun sos grados de ufficìale.

A sa divisa mancan sas mostrinas,
su fregiu 'e su bonett'est puro assente,
ma vest s'isciarpa, s'isciabola luchente,
bandoliera, giberna e ispallinas.

Gianchetta, cinturone e istivales,
de cavallaru sun sos pantalones,
sun galu attaccaos sos isprones,
gasi vestian son ufficìales.

Unu ritrattu 'e Missegnor Vilia,
duos sun Issu e Gantine Pirìsi,
si osservades' un'est' in gaghisi,
un' in gurrai est de fotografia.

Vat galu cosa meda in su calasciu,
c'a narrer non mi venid'a sa mente,
ma lassamus de susu s'ambiente,
pro vieremus su chi vat'in basciu.

Abbasciamus'a s'urtimu gradinu,
a su pianu 'e terra in su locale,
accattamus de err'unu portale,
e de vronte notamus su molinu.

Vest sa preda, laristro e i s'imbastu,
su chi pro molere it totu occurrente,
giravat su cavaddu o su molente,
separand'ozu dae s'abba crastu.

Su molinu 'e su tridicu l'aviana,
ca vest sa preda e best su moiolu,
su cavaddu e chera in di'e dolu,
sas candelas'a issu l'allughiana.

Sa candela de ozo e de carburu,
sos istareddos chi usavan'in bidda,
tripide, lapiolu, sa orchidda,
pischedda e linna pro su casu puru.

Bi sun sas rodas de su carrettone,
sa raspa, cun sa serra e i sa lima,
richiestas dimandas cun sa vrima,
su garagolu, sa morsa e s'ascione,

Est custa domo de oggettos ricca
Chilivros, cun sedatzoso e cradeas,
bancu e butecca pesoso istadeas,
cun sos bottos pro sa castanza sicca.

Su passadissu lu lassamus como,
e intramus in ateru aposentu,
locu de pane assau e pane lentu,
cocchiana e de cocher'est' sa domo.

Pannos de pane tazzeri e canisteddu
Sa pala sa palita pro infurrare,
e pro poder suvighere e fresare,
vad'una mesa e unu mesicheddu.

Sas casciarolas de ramene anticu,
s'istoja, su vronigliu e caffettera
de terra cotta sa brocca e supera,
a s'ater'ala sa pressa e limbicu.

V'i sunu de mattone sos urreddos,
chi sas massaias avian'a manu,
iscopulu, iscopile su tianu,
sa murica rodanza e canisteddos.

Totu no apo nau mi credide,
so arribau a narrer cant'ischeo,
torrade a bisitare su musèo
ca vat galu de viere e bidide.

A sor biados meritos si diada,
c'anaere a su chelu fatu iscalu,
dachi lassau han totu pro regalu,
in suffragiu 'e s'anima lis siada.