Bazi versos, cuncurride
a su premiu ‘e Caria.
Sa prus bella poesia
a inie che giughide.

Giughide che una cantone
de paghe, fide e amore
ch’in su tempus benidore
la cantet ogni pessone.
E che Divinu sermone
de Gesusu, la legide
e sa risposta intendide
ch’inie bos an’a dare,
sena pius duritare
bazi versos, cuncurride.

Giughideche sos fiores
chi naschen ogni manzanu
in su coro ‘e su eranu,
pintos de milli colores.
De s’anima sos umores,
de su coro s’allegria
da chi cun sa pinna mia,
carchi umile versu iscrio
comente custu ch’imbio
a su premiu ‘e Caria.

A sa luna, a sas istellas
pedide azudu, a su sole,
chi totu s’umana prole
bidat torra dies bellas.
Sas annosas bagatellas,
su famen, sa tribulia
iscumparit che majia
si totu sos chi cumandan
a sos abbojo da c’andan
canteren a poesia.

Custu est su meu auguru
e de sos poetes totu
sos chi deo apo connotu
e chi non cunnosco puru.
E cun limbazu maduru
naro a issos, iscriide
a totue e cumponide
mutos barrios d’ispera
e cun istima sintzera
a inie los giughide.

3° classificato - Sicunda editzione Prèmiu de poesia “Armando Pira” Nùgoro, 04/09/2014