Delicada Virginella
di Antonio Maria Denti

O mia delicada Verginella
chi pro te nde regiro nott'e die
in cudd'istante chi non bido a tie
so desoladu che puzone in zella
ca ses troppu gentile e meda bella
su sentidu furadu mi has a mie
de cantu ti hapo affettu e t'hapo in coro
cantu pius ti penso pius t'adoro.

Si ti naro chi t'amo ardentemente
est ca ti tenzo in su coro inserrada
si m'abbandonas tue prend'amada
resto disisperadu eternamente
so timende a mandare un'imbasciada
non ti maltratten turture innozente
mi mancat su coraggiu, hapo paura
perder a tie candida ermosura.

M'ispinghet su destinu e-i s'affettu
s'amore chi ti tenzo a l'isvelare
a lu poder mantenner in segretu
est cosa chi mi faghet regirare
ma tenzo s'isperanzia e s'isettu
chi tue no mi tes abbandonare
ti penso cun costante affezione
t'istimo cun ardente passione.

Ite bella fortuna chi est sa mia
si m'est fìdele sa chi so amende
si aberu mi tenes simpatia
comente mi ses sempre promittende
atera cosa no nde so bramende
ca in su mundu bramo a tie ebbia
non pozzo menzus bene disizzare
si resesso columba a ti lograre.

Si resesso 'e lograre custa rosa
so s'amante pius affortunau
ma si 'enzo da te abbandonau
passo sa vida trista e dolorosa
de cantas bellas hapo abbaidau
una non nd'incontresi geniosa
si tue no mi dàs custu cunfortu
solitariu abarro fìn'a mortu

Non m'abbandones! Lè su coro in manu
no bi naschet pro me ateru amore
si s'affettu chi t'hapo est tottu invanu
certamente nde morzo 'e su dolore
cuddu risu simpaticu e galanu
ch'hada abbagliadu onzi ammiradore
cuddu trattu gentile, su faeddu
faghet dilliriare su cherbeddu.

Cudda mirada su trattu gentile
est benignu, simpaticu, attraente
ses pura, delicada, sorridente
in su primu isviluppu giovanile
de cantu ses onesta e ses civile
ammacchiada nd'est tottu sa zente
cun cuddos ojos bellos de incantu
faghes peccare fìnas unu santu.

Si m'abbandonas, perla 'e diamante,
certu chi no m'has geniu profundu
mi dio cherrer fagher ambulante
in tottas chimbe partes de su mundu
pro te poder girare tottu in tundu
dae ponente fìnas a levante
ma si giro su sole, terra e luna
che tue no nd'agato un'ater'una.

Principessa, marchesa o damigella
de sa menzus istirpe italiana
caliguna hat a esser finas bella
dilicada, simpatica e galana
ma sa chi lughet prus de cada istella
ses tue sarda turture isolana
chi nobilitas tottu sa natura
tantu ses bella in coro e in figura.

Si abitados sun sos pianetas
e sos astros chi sunu in s'orizonte
e si cuncurren tottu sas elettas
fizas de ducas, barones e conte(s)
e finas issas chi sunu perfettas
sas noe Virginellas de su Monte
s'han'a turbare appenas chi ti mirana
e avvilidas, bintas si ritirana.

Lughe 'e abrile in sos ojos bellos
riccos de un'amabile mirada
t'adornana che duos pinnadellos
brundu su pilu in sa frizza dorada
pinna no b'hat, ne mastros, ne pinzellos
chi nd'hapat una menzus pinturada
pro modellu t'hat fattu sa natura
o su Deus chi regnat in s'altura.