Deo e tue cun Deus

di Benito Saba (2005)

Pedru giamat su fizu, chi si girat
pro si ch'andare cun trigantu mannu,
li faeddat, l'iscultat e lu brigat:
fit arende in binza e at fattu dannu!...
.... .... ....

Si s'áteru est connottu da' sa mente
in s'isperientzia piena 'e su mundu,
no est inventu a giogu 'e una lente
fartza e posta a mie matessi in fundu!

Si s'átere ses… tue… non so solu…
deo a tie so... tue... Causa?... effettu?...
tirat che fune 'e abbilone in bolu,
ligadu a terra, ma de altu cuntzettu...

un'Áteru a sa fine est prontu a dare
su benénnidu 'e su Tue perfettu!
E si crees chi non podes bolare
ca ses solu matèria e s'intellettu

est fruttu ebbía de s'evolussione,
comente at fattu sa materia sola
a nd'essire da' s'iscura presone
de s'inerte incussèntzia, bòdia arzola,

e issa etottu e s'átere incontrare
e nd'áere cussèntzia e sentza duda?
Deo e Tue non si poden pensare
cun fundamentu in sa materia nuda!

Sa vida vegetale e animale
podet esser dian sos elettrones,
ma sa cussèntzia est ispirituale,
su Deo e su Tue nde sun budrones.

Deo e Tue non sun da' sa matèria,
mancari bia, sun da' Aterue...
s'Ispìritu 'e Deus est un'artèria
ch'ánimat a mie, a tie, in tottue!...

Si òdiu o amore as pro aterunu,
mi' chi Deus est in isse, est incue...
Cando prego, pius grande non b'at niunu:
su Tue est Deus e mi giamat Tue!

Benito Saba

Questa poesia ha conseguito il secondo premio - Sezione Poesia in rima - al XVI Cuncursu de poesia in limba sarda "Sa Madonna 'e su Nibe" - Teti - 2005 - Tema obbligato: "S'idea 'e Deus, su crere ... su non crere"