Deo fui sardu
di Renzo Rosa

Tempos passados, epoca lontana
de s’Icnusa antiga, valorosa,
de cudda mama nostra premurosa
chi hat dadu sa vida a sos Shardàna;
e deo so erede, nadu m’ana,
de cussa razza, ma pro ite cosa?
bidinde, s’isola ‘e sos immortales
ispozzada da e sos continentales!

Cussos chi furan rena da is aruttas
ca pensan chi pro nois no at valore
e brunzos chi su sardu gherradore
cuait in nuraghes e in gruttas;
tottu imbatten cun ungras accuttas
paren faghindenos unu favore
cando nos naran: “Sardos brava zente”
e intantu, trazzan a su Continente!

E deo sardu, su fieru pellitta
deo mi caglio mudu! Nudda ‘io
a dentes serradas mi nde rio
si mi fotografan cun sa berritta;
non canto prus! Ma calchi cosa iscrio,
pro tenner bia s’ultima ischinditta
de antigu gherreri, como in paghe,
chi est perdinde s’ultimu nuraghe.

Cun sa berrita longa, a fuste in manu,
cun sa bertula accoddu e in cambales
mi ponen in mustra in sos giornales
e a mi bier benin dae lontanu
cando mi mudo, in ragas e cobbanu
e lis ammustro loros e giuales:
so sardu, e balanzo calchi soddu
pro mi pintare, cun s’anzone a coddu!

Deo fui sardu in tempus passadu,
fieru e coraggiosu che leone,
fui eroe, cando appo lottadu
cando appo difesu sa natzione;
fui poeta, semper acclamadu
in d’ogni gara, veru campione
e como vivo isettande s’ora
de narrer una die: So sardu ancora!

(Eros)