Dia cherrer
di Larentu Pusceddu

Dia cherrer caminare, lizeru che bentu,
supra montes desertos e mudos,
toccare sas nues andarinas,
annotare mugras a brincos de briu
e crapolos, a gamas, in fua,
osserbare sinnales anticos
interrados dae su tempus chi mudat.

Dia cherrer in baddes assoliadas
zumpare trainos fuliosos, in murmuttu,
mirare colores dae semper intattos,
ocros de luche a su sole de s'Eranu
e limpidos lagos, cristallos de aba
partorida bundante dae sa terra
chi cuat in sas grutas, naturales secretos.

Dia cherrer faeddare sintzeru
su matessi limbazu de sas feras
pro las poder muttire a risitos
dae sas tanas prufundas e sicuras
pro jocare a cua cua in buscos umbrosos
abbuddados dae fines rajos de luche.

Dia cherrer bolare pro sichire su bentu
e carinnare gurturjos famidos,
cando alluntzinan dae artu s'aunzu,
debiles bestias de sa sorte ignaras,
e s'abassan che lampu e impiedosos istratzan
cun francas d'atarzu, iscutinande sas alas,
sas dilicadas carres issoro.

Dia cherrer che mariposa, incantu de colores,
supra nuscos, nettare brundu sutzare
in sos tepios Eranos d'incantu
cun su tziulu armoniosu de puzones,
ninnios de mare, de continu a solingu,
e frinas, de mendulas froridas, a s'aurora luchente.

Dia cherrer che biblica culumba
cun d'unu rampu de olia, birde prata, in su pittu,
bolare bianca nida supra s'Eternu Diluviu
ch'istratziat s'umanidade, ludru issambentadu,
pro donare a su mundu sa Pache.

(Menzione d'Onore - Mores 1981)