Dia cherrer bolare, si podia,
attesu da-e custu Mundu feu,
a ube dogni cosa, fiza ‘e Deu,
est vera sorre mia...!

Sol’in cue sa paghe disizada,
s’ispera de su coro, su cuntentu
de s’Anima sinzera, ogni momentu
passione est lobrada...!

Sol’in cue s'ingannu no hat vida,
su Male no esistit, s’onestade
est reina de un’Umanidade
sena peccos unida.

Sol’in cue triunfat cudd’amore
chi sonniant sos bonos sentimentos,
ne superbia b’hat ne attreghentos
de perunu rancore.

Sol’in cue de Bene s’hat afficcu
e prellas sunt sos nobiles suores;
mai negat sos dépidos favores
a poberu su riccu.

Sol’in cu’est sa vida e sunt lucura
sas pesantes fadigas d’ogni die,
ne b’hat usurpadores e ne chie
ingrassat da’ sa fura...

Sol’in cue su viver est perfettu
e sos coros s’istimant inter pare;
nemos offendet nemos, ne mancare
s’intendent su rispettu.

Sol’in cue su risu pari pari
s’iscambiat sa zente, sena finta;
non b'hat no traitores, ne hat tinta
de samben su ‘inari...

Sol’in cue sas massimas divinas
sunt rispettadas da-e totugantos,
ne, pro finta, a passizu ‘ogant sos santos
zertas manos "cainas"...

Sol’in cue guvernat s’Esistenzia
sa pius bella leze de Natura
ch’a ogni coro narat: “Tene cura
de sa tua cussenzia”...

Sol’in cue est intesu dogni die
cuddu “Nadu” ch’a bonu portu ghiat:
“Su chi fattu no cheres chi ti siat
no lu fettas a mie!”.

Bolare a’ cussu logu, si potera,
sa brama mia est, ma custas alas
mi sunt che trista rughe subr’ ‘e palas
bocchìndemi s’ispera...!

Bortigali, 19/1/1954 A. F.
Pubbl. in «S’Ischiglia» agosto-sett 1954.