Dia cherrer cantare pro te,
Sardigna, unu cantigu nou
cun d'unu coro nou.
Unu cantigu 'e manzanile
chi appasighet sas undas tempestosas
de su mare 'e d'incras.
Unu cantigu luminosu de isperanzia
chi affoghet tristura e amargura
e pienet sos coros de allegria,
de risu e siguresas.
Unu cantu chi passet su sidi
comente abba frisca 'e funtana,
ch'iscaldet che raju 'e sole
e ojada amorosa 'e muzere
amante e amada
dia cherrer cantare pro te.