Cando 'enit sa die
chi custos ojos s'han a istudare
in s'ora subr'a mie hat a bettare
sa Morte, s'umbra sua e-i su nie.
Tando ritenzo chi siat finida
ogni pena patida,
umpare cun s'istraju 'e s'agonia.
A manu a manu s'hat a cancellare
tottu su ch'hat iscrittu
su Fadu malaittu
in sa carena mia;
ne che atteras bias
in sas mortas pupias
de sole ne de luna
non penetrat pius lughe peruna.
E a su corpus meu, in tottu surdu,
de cantu 'enner li podet addossu,
non nde l'importat chi rosighet s'ossu
su sorde ingurdu.
E tue, foressida,
a sa mortale tua presonia,
a inue has andare anima mia,
istinchidda 'e sa vida?