Dinda troppu fantastica
di Melchiorre Murenu

1.
Dinda, troppu fantastica in sas pumas,
confusa ses de tanta fantasia;
e-i sa genitora maladia
est fattu tou, mancari presumas.

2.
Ca ses macca e non ischis cantu faltat
sa chi possedis de presunzione;
cungregada est cun issa in unione,
dogni meritu bonu si che appaltat;
su difettu maternu est chi t'assaltat
in su mezus fiore 'e pizzinnia.

3.
Sa fantasia vana est in sas maccas,
sos fumos in su poveru arricchidu;
pro cussu las has postas in olvidu
sas costrintas, mischinas e fiaccas;
pro esser assistida cun teraccas
tenes una superba bramosia.

4.
Troppu tenes superbia e fervore;
sa boria si ti legget in su fronte.
Ma Deus tenet sole in s'orizonte
pro distruer a tempus su lentore;
inue b’hat de poveros sudore,
sa sienda s’iscazat che ‘iddia.

5.
Pagu sas fantasias sun durabiles:
sa fortuna perfetta no l'han tottu;
podet esser chi càmbiene motu
sos bentos chi sun oe favorabiles;
e torren sos estremos miserabiles
a ti fagher corteggiu e cumpagnia.

6.
Nemmancu in sas ecclesias refrenu
ti lassat tenner s'umbra temporale;
postu t'has sa cadrea in su centrale
cun disordine tou e dannu anzenu;
Torrada est Madalena a su terrenu
cun sa sua pomposa galania.

7.
Lassa, lassa sas modas indecentes,
non turbes su paisu tottu interu.
Si tenias provadu cunsideru,
bidias d'ambas partes sos parentes
afflittos e mischinos e dolentes,
membros de povertade e porcheria.

8.
A la finis! Non fisti generada
da' illustres, comente tue crêse:
connòschedi, connosche chie sese,
vive piùs comune e moderada.
Non t'ispantet sa doda antecipada,
bennida cun orgogliu e ingannia.

9.
Pro sa grande superbia chi tenes
sa critica non bides né intendes:
anzis de nobilia ti pretendes
pro ca possedis cussos pagos benes:
s'in cust'ispettativa ti mantenes,
creo chi già ti moris bagadia.

10.
Su re tenet sergentes e soldados
pro cuddos chi s'intiman disaffiu,
dolores e consuntu tisichiu
subra sos piùs membros delicados:
pregunta sos piùeres passados,
ca sunu mortos de cussa genia.

11.
Su genitore tou tantu ingratu,
a su paisu est bènnidu mezzanu,
cun d'unu tappulone in su gabbanu,
mannu cantu unu chelu de sedattu,
de indecente furesi ismurratu
chi de saccu teniat simetria.

12.
Coment'andas a cresia mazore
pares fiza de conte e de marchesa.
Ca non connosches sa summa chi pesa(s)
e dogn'istrattagema ti est onore,
cun cuddu tuju tortu che astore
orettende s'amante fissa ebbia.

13.
Pro tirare sos ojos tottu a tie
faghes cuss'indecente istrattagema,
inue est sa presenzia suprema
de su chi si vindicat unu die
e armat su furore contr'a chie
in domo l'hat usadu s'ingannia.

14.
C'has desizadu chi ti cheres dama,
bogas modas, prefaglios e buzzera,
cun bestir'a sa moda furistera,
però ti deghen che mala fiamma:
chie non l'hat connottu da' sa mama
non cumbenit marciare in geometria.

15.
Mira sa geometria, ite narada!
Ca non t'est bella cussa pettorina:
ca che nd'hamus de mezus raighina,
ma nessuna che tue ammacchiada;
e tue ti pretendes pro marcada
pro t'ammittire in sa cavaglieria.

16.
Reformadu lu 'ogas su 'estire,
de una moda tale ammacchiada,
pro sa cale ch'est moda refudada:
con custu e ite cheres presumire?...
Regirada t'accabbas de avvilire,
ca 'estida cumparis che istria.

17.
Già t'hamus bida a sa moda calzada,
ancora chi cumparzas pei nuda,
de sa pannia 'e s'iscarpa de Giuda,
dabèi tue e tottu una mirada,
ca finzas in sos pês ses castigada
e in membru perunu has seguria.

18.
E pro unu ventagliu 'e battor soddos
cun d'un'aneddu de galanteria,
pro cussu has desizadu nobilia?
Ses nudda e ti faghes tosta in coddos.
S'accusamus sos tuos azzoroddos
ti cuas totalmente de una ia.

19.
Pover'issa! Nde vivet in sospetta,
ca su D. no lu ischit confuzire;
nei s'S. bi podet costruire,
nei su B. cuncordat con sa Z;
o C. si riguardat sa suggetta
comente si l'addeghet civilia.

20.
A la finis! In tottu superada,
mancari sias in mesu de chentu;
Cando has a lograre cuss'intentu
parizzos t’han a bider imbezzada;
ca pizzinna ses pagu regulada,
de superba idea e bramosia.

21.
E-i sa genitura maladia
est fattu tou, mancari presumas.