Disamparadu sias ben’ennìdu
a custa terr’antiga d’emigrantes.
àteros tempos mamas de zigantes
chi da seculos an lassadu tratas,
dimoras chi gal’oe sun intatas,
a tempestas tremendas resistidu.

Tando, dai sas costas africanas,
sos jajos tuos, concuistadores,
che barbaros, crudeles invasores
an assaltadu sos sardos terrinos.
Sos “Moros” fin giamados, “Saracinos”
reos de malefatas e bardanas.

Ma oe non pro fagher concuistas
la ses lassende sa nadìa terra.
Ma pro ca ses custrintu da sa gherra,
de guvernantes pérfidos, tirannos!
In su menzus fiore de sos annos
chircas paghe, tribagliu chin provistas!

Bidende a tie, m’enit a sa mente,
a primos de su seculu passadu.
De cando jajos nostros emigradu
an in logos lontanos mai bidos,
e in totue los an acoglidos
e los an ospitados dignamente.

Fortzis pro cussu custa terr’antiga,
pro chie benit, umile, leale
fit e restat, pro semper ospitale.
Finas pro tene abertu est su giannile,
no agatas puntadu su fusile,
ma una manu tesa, cald’amiga!

Duncas si benis, ne prata ne oro
agatas. Ma bisonzu e povertade.
Ma de su pagu ch’amos, caru frade,
chin tegus dividire lu cherimos.
E si dare de prus non ti podimos,
acuntèntadi de su bonucoro!

Segnalazione di merito – Premiu de Poesia “Tiu Finu” - Romana 2015