Disdicciada
di Giovanni Fiori

Cuartinas de noenàrios

Cun dies dicciosas in coro
su sinu che bascu in abrile
currias allegra e deghìle
bisende araccadas1 de oro.

Sighias luguras biancas
sonende s’ispoddinajola 2
isolta3 che una crabola
chi brincat padentes e tancas.

E dende sa tritza a su ‘entu
giughias in manos su mundu
cun chentu pitzinnos in tundu
betténdedi trigu in cunventu… 4

Bolende che fozas de rosa
sos ànghelos bella t’han bidu…
Sa beneiscione5 ‘e s’affidu
ti l’hana ‘ettada in sa losa.6

_______________________________________
1 araccadas (raccadas) - orecchini, pendagli.
2 ispoddinajola - cernitoio; utensile domestico di legno su cui scorre lo staccio con la farina da setacciare.
3 isolta - libera, agile.
4 in cunventu - cospargendo di grano gli sposi all’uscita dalla chiesa il giorno delle nozze, secondo l’usanza dei nostri paesi.
5 bettare sa beneiscione - dare la benedizione: il padre e la madre benedicono gli sposi cun su trigu prima di recarsi in chiesa per lo sposalizio.
6 losa - tomba, sepolcro.