Disizu
de Vittorio Falchi

Sos penseris tuvuccos
han su sabore de unu ‘isu
e chircan su biaittu
chei sas altas fozas de sos fustialvos.
A boltas sonat su ‘entu
un’organittu de frunzas de salighe
e in d’unu giru de dansa
s’alloruman mariposas e rajos de sole.
Su riu radiante de festa
si divertit cun sa ‘uda
e giogat cun sas liscias pedrighinas
e carignat sas roccas de basaltu.
Su coro meu
diat cherrer cantare a boghe manna
in su mundu luminosu de cras.

3 de martu 1982