Disterrados
In d’una notte ghelada
de lunas beffulanas
semus ughidos
dae sar raichinas nadias
chin sa conca inchissinada
de brigonzas e penas
e una bertuledda prena
d’ispreu e de bisonzu.

E amus pistadu tottu
sas carreras de su munnu
attaccados a sa coda ‘e s’erbeche
chircanne pane bonu
menzus de sue su tricu
e beridades nobas e de pache.

E amus lassadu sa bidda bodia
de cantos de massajos e pastores
de boches alligras de pizzinnos
currenne iscurzos in sos bicchinados.

E sa campanas de sa turre bentosa
amus lassadu
chin attittos e toccos de brunzu
e sar domos astradas
de ludu e de pore lubadu.

E oje
cherjo torrare
Incanidu
chin sa matessi bertuledda
prena de ranchidos disingannos,
a mi pasare a sa fine
a pedes de “cadone”
a s’umbra ‘e su monte
tra tinnidas de aemmaria
e d’erbeches sicuras paschenne,
chin sos chercos froridos
de brocheddas nobales de ispera
ube cantana e annidan’ alligros
sos puzzones.

Disterradu
“Cadone: Vicinato a valle del paese adiacente al cimitero”

3°classificato sezione B premiu puisia salda Giacomo Murrighili 2019 - Loiri Porto San Paolo (Olbia)