Doda strumada
di Larentu Pusceddu

Pariat femina graida a sinu nudu
isterrida a sos rajos de su sole
su birde muntecru chi limbas purpurinas
an lintu, ladas e fumosas,
artas finu a chelu a trachiddas de fozas,
mudadas in candidu e pruerosu tallaranu,
dandeli dae attesu, s'iscuricore de sa notte.

Non s'est sarbadu su crapicu brundu
inue sas raicrinas, iscratzadas
che istratzos prudicados dae su tempus,
filos intritzados, chena capu,
si sun pupuinados in caminu
innantis de poder pungher s'ena sicca.

Sos murmuttos sutta s'umida terra,
diventada tot'in d'unu rocca ardente,
sun mudimine, como, coro firmu.

S'est iscorzadu su truncu seculare
pro lassare nidos a formicas conchi rujas
e a nues de corroncas ali grogas,
chi famidas si ghetan a sas predas,
pitulande tirrios assustados.
In sas feridas assuttas, s'idet crara sa morte.

S'imbilicu, ingullidu, est lagu boidu
inue bi nadan pantumas in atitu
e dae sa brente, pradu carpidu e fadicadu
bi naschit erba cun frores de carbone:
su muntecru at partoridu chisina
doda strumada de sa natura traitta.

(1° premiu - "M. Murenu" Macumere 1983)