Domo Nostra
di Gigi Piu

Che-i su ’ostru abbìtu cun calore
Su Circulu giamades “Domo Nostra”
Azis ancor-in bucca su sabore
De sa materna tebia colostra;

Ch’azis sutu in sa cara terra ’ostra
De lagrimas infusta e de suore,
Terra de poesia e de amore
Solu po sos turistas tent-in mostra.

A bois est negadu su dirittu
De viver in sos logos de s’infanzia
Sena tribaglios e sena inaris;

Ma de torrare a su nadìu abbìtu,
guai chi peldedas s’isperanzia,
sardos sezis? E tando forza paris.-

Magumadas su 29 de Abrile 2001