Dormi serenu
di Tonino Ruiu

(Attitu)

Sennoredda ’e sa Grassia
beni e pranghe chin mecus custas penas;
pranghe custa disgrassia
chi mi siccat su samben in sas benas.
Beni Santa ’e su coro,
e canta cust’amabile tesoro.
Pompialu! Non lu bies
chin sa bucca ’e su risu prus galanu?
Bi mancaban tres dies
pro crumpire su sonniu soberanu
pro piccare in isposa
sa femmina prus bella e grassiosa.
T’han puntu sa carena
chin d’una leppa garriga ’e margura.
Mazine nazarena,
comente faco in tanta disagura?
Fizu, dormi serenu,
in custu mundu libidu ’e benenu.
Sa pache hat arribare;
so sicura; lu juro in su banzelu!
Sos Santos de su chelu,
tottus, a unu a unu hapo a chircare.
Hapo andare a s’ifferru
a pedire s’azudu ’e Luziferru.
Fizu meu ’e su coro,
ube sun sas promissas chi m’has fattu?
In custu mundu ingratu
a tibe, o Deus meu, solo improro.
O nues de bambache,
in cus’ifferru dazemi sa pache.
Nara, frore ’e beranu,
it’est chi faco commo sola?
Acra che miriola
m’est sa bida. Ite faco? Gherro imbanu.
Imbanu, fizu meu,
sico a penare in ungras de s’anneu.
Che macca sinna-sinna
ti prango inoche, in cuche, in sos caminos;
chircande sos Cainos
chi t’han dolau s’anima pizzinna.
Finzas chi los azzapo
in tottube los chirco o morte nd’hapo.
Lis naro su rosariu
naccarande sos berbos a s’iscusiu,
pro chi tottu contrariu
lis siat in sa bida. E cada crùsiu
lis aperjat in pedes
paris chin tottu cantos sos eredes.
Deus, ite so nande?
Non l’isco mancu deo su chi cherjo.
In su coro m’aperjo
sas pragas chi a tibe so curande.
Sas pragas de s’amore,
iffustas de cossolu e de dolore.