Duru duru de sa Sardigna
di Larentu Pusceddu

A duru duru duru sia

sos campos de Baronia
daen sindria e melone,
in Tonara su turrone
juchet mendula turrada,

sa Barbaza est numenada
pro mortores e pro furas,
sa zente de sas Gadduras
cantana a sa Corsicana,

Tempio bufat aba sana
dae su fruncu de Rinaggiu,
cun arbadas de atarzu
aran terra in Campidanu,

Isili est in Sartzidanu
chi b'est su bagnu penale,
so andadu cun carrale
ammorare a sa Costera,

in Burgos Eleonera
su casteddu at fraicadu,
unu Bonesu at gherradu
contra de sos malos meres,

e si binu bonu cheres
bufal'in Mandrolisai,
in sa coa de mannai
seo pro mi ninnare,

dae sa Chirra bolare
s'iden de prata puzones,
in Marghine sos anzones
paschen friscu su beranu,

in Orzastra s'ozu sanu
lu bocan cad'annu a rios.
in sa Pranarza sos crios
che pische maduru nadan,

in Nuogoro si t'infadan
no est pro ti cumbidare,
bonos poetas cantare
s'intenden in Logudoro,

in Sardigna non b'at oro
ma naschit sa poesia,
duru duru duru sia.

(Inedita)