E' sempr'edda
de Antonello Bazzu

V'era una vostha Sassari
chi soru a ammintalla,
ancora mi ridi lu cori.
Chissa chi candu farabi
a Piazza a carasori
vidi i' li fundari li casi
bianchi e li monti curo'
di l'aria i' l'Asinara
e i' l'osthi e l'aribari
lu rissori giugghendi a mabó
cu' lu biancori
d'una vera ipastha in asthu mari.
Chissà sì ch'era Sassari!

Veru! Parò abà... Puru
si no è cument'e tandu,
puru si parazzoni fei l'hani
ifriguradda, l'impidraddu
è turraddu i' l'isthrinti, poi di
tant'anni suttarraddu i' lu catrammu
e s'hai occi a figgiurà,
da li baschoni ischascinaddi
di li casi tarreni ancora in pedi,
fazi l'uccittu un fiori,
una pasthera di basiri e n'èscini,
currendi che saetti, dui
cabbareddi ricciurini
da sott'a li robi
tesi, asciuttendi a lu sori.
Zesthu no so li pastheri di baschu
di lu puetu famaddu
e li pizzinni no so a l'ischuzza
e hani... li facci nieddi!

E cosa vo dì? Lu mondu è ciambaddu,
manc'eu soggu più lu matessi!
No ridèsciu manc'a riggì
l'ammenti chena chi una làgrima
m'infòndia li pibiristhi.
Sassari è sempr'edda...
Anzi mi pari
chi sia mégliu abà!

Primo Premio - Poesie in sassarese e sue varianti XXXIII Concorso di poesia "CULLEZIU 2013" di Sassari