“Considerate la vostra semenza:
fatti non foste a viver come bruti,
ma per seguir virtute a canoscenza”.
Inferno - XXVI

E tue Deus bonu ite nde naras
de custas ingiustìscias bardaneras
ch’iscurrizan che feras airadas
peri tottu su mundu cant’est mannu?!

S’in s’ora chi l’has s’anima abbivadu
m’haist’aizu tentu in contu, forsis
sécula seculòrum chena berbu
ne seru in gràscias lassadu l’haisti…

Tue, in sé perfettu in mente e fattos,
a manu dadivosa e coro immensu
cun sa lughe frunidu l’has de tottu
pro esser bonu e giustu e sabidore;

ma ca l’has dadu s’arbìtriu puru
s’est fattu su mannosu . E sighit gai
chena sinnu ne sale a ojos tzegos
su mezus de su mezus ch’has cumpridu…

Oe torra a su témpiu iseniadu
cun atzottas de fogu a ch’iscanire
mercantes, fariseos e furones
gai coment’has fattu in tempos tuos.

Cabidanni 2023

--------------------
- bardaneri - da bardana, razzia di bestiame; razziatore, qui in senso fig.
- feras airadas - belve feroci.
- peri tottu su… - attraverso, lungo tutto l’universo.
- abbivare/du - avvivare, vivificare, animare, infondere la vita.
- berbu - verbo, la parola. Vangelo Giov. 1, 1-2.
- seru - accortezza, avvedutezza; senno; coscienza di sé, sensibilità morale
- dadivosu/a - generoso, magnanimo, munifico.
- cun sa lughe… Genesi 1, 1-5.
- sabidore - sapiente, saggio.
- mannosu - superbo, esaltato, delirio di grandezza.
- cumprire/du - compiuto, finito, qui nel senso di creare, creato.
- témpiu iseniadu, iseniare - degenerato, tralignato, deviato. Vangelo Matteo 21, 12-17.
- iscanire/du - scacciare, allontanare, mandar via con la forza.
- furone/s - ladro, predatore, estortore.