E bos ap'idu
di Larentu Pusceddu

E bos ap'idu
a unu a unu partinde
amicos mios.
No amus a currer prus
a boches, ridende,
in s'istradone pruerosu
de s'ichinu de Iscattai.
No amus prus
a ispuddare terrinos,
mundos de papilu,
tzerchios minudos
sinnados cun roccos,
ca sa terra est prus tosta
e puntzottos e limas
sun consumidos
dae su ruinzu de su tempus.
No amus prus a chircare
nidos de Toncas
o de Astores famidos
in perchiles e roccas.
Sos tirrios acorrjalos
de tzerchios iscravados
dae rodas prudicadas
de carros frundidos,
nos tumbin in oricras
che mulios de boes.
Sas grutas sun boidas
no an oe prus vida
ca non biden sos jocos
de s'anticu cua cua
e no intenden suspiros
de sos primos disizos.
Solu in sos ortos abandonados
podimus furare a iscomissa
erba naschida za fenu.
E so arreadu inoche
amicos mios,
solu, isettande, isperande.

(1° Premiu - Bichinadu S.Paulu - SS - 1979)