E candidu felludu apo palpadu
di Larentu Pusceddu

Canta, a boche lena, coro meu
in sas umidas baddes de su chelu
su ch'issa in olvidu m'at donadu.

Ti che sun ruttas sas fozas
che unu velu chi cuat sas bellesas
chi as retzidu dae Natura in abundantzia
che pacas eletas in su mundu.

E candidu felludu apo palpadu,
lizeru, lisiu, disizosu,
in custa terra de nues
chi vaporosas si moen
a cada ardente carignu
chi respiras che aera vitale.

Sas paraulas sun murmuttos,
sos suspiros alinos d'entu
sos basos mareas a sa luna.
Sas undas chi t'allagan custa grutta
e sos frores de ruju papaurru
daen sensu e potentzia a cust'amore.

Si s'acurtzias su sole de mesudie
a dorare su corpus tuo
ermosu e de brunzu iscolpidu,
sa manu dilicada t'est amante
e sas pupias iscuras
s'isparghen che rosas a s'Eranu
e brillan che ispricos a sa luche.

Sas dunas de rena, fine che filos de seda,
a sa passione atraen sos Abìles,
ma sas francas lis diventan prumosas
ca s'affundan in s'irde mare tuo,
chi nemos prima de me at navigadu.

(Segnalazione - "Sarcidanu" Biddanoa 1980)