E cantas muttetus
di Sandro Chiappori

Faendi crucuju su celu
nd’at studau sa luna
notesta in su medau.
A luxi de lantiedda lèbia
lassas indrommiscai s’ànima
forroghendi in sa muccìllia
carrubas suciosas
de notis de lugori passadas
candu unu tempus
in su celu lìmpiu
acciungìasta steddus
po nd’apicai bisus e disìgius.

De foras
s’intendit s’àbidu ‘e sa noti
cancunu pitiolu trinnendi
scorrocciadas de tronu atesu
ma no t’ind’incuras
de su tempus chi passat
marigosu e stramu
a tui andat beni aici
solitarju cun is siendas tuas
e fintzas bisus
tenis allogaus in celu.
Tandu
fais unu schirìngiu ‘e arrisu
oberis is ogus…
e cantas muttetus.

E canti dei muttetti

Annuvolandosi, il cielo/ ne ha spento la luna/ stanotte sull’ovile./ Con la fioca luce del lanternino/ lasci appisolare l’anima/ frugando nella bisaccia/ bacche succose di carrubo/ di trascorse notti di chiarore/ quando un tempo/ nel cielo terso/ aggiungevi stelle/ per appuntarvi sogni e desideri./
Fuori/ si ode il respiro della notte/ qualche sonaglino tintinnare/ lontani fragori di tuono/ ma non ti preoccupi del tempo che passa/ amaro e bizzarro/ a te va bene così/ solitario con le tue ricchezze/ e persino sogni/ hai messo da parte in cielo./ Allora/ fai un sorriso/ apri gli occhi…/ e canti dei muttetti.

1° PREMIO Concorso “QUARTUCCIU 2010” Sezione Poesia lingua sarda in “Verso libero”