E cantos 'ighinados............
de Antonio Sannia

Nues nieddas, umbras e iscuru,
logu brujadu, ch'est caladu a fogu,
traìnos boidos, bruttos e mudos;
e s'erba sicca, de colore grogu,
sos isteddos, nieddos issos puru,
arbures chena fozas, paren nudos.

De canna 'e rù sas laccanas sun prenas,
tulas de lizos e rosas siccadas,
pasturas chi b'at solu ferrulaghe;
e tancas che desertu, chen'aradas,
sa terra chi connoschet solu penas,
su mundu in gherra, ch'est chircande paghe.

Astores e benturzos sun bolande,
cun istrias e corbos in s'aera,
e sa corroga in bolu ses pesada;
arrastu malu at leadu sa fera,
in giru b'at mortòzu e l'est chircande,
in tottue, a sa disisperada.

Canta zente ch'est pobera e meschina,
setzida in sos caminos de s'ispera,
aisettat su pane po campare;
de l'infurrare non bi nd'at manera,
ca tenet trigu mortu e pedrighina,
a malaoza tuccat de furare

E cantos 'ighinados, chena zente,
ue non b'at prus novas de contare,
e ne risos e boghes de pitzinnos,
ch'essin a sa carrela a friscurare ,
sos mastros chi non tenen prus ischente,
de povertade, custos sun sos sinnos.

Pustis de sa turmenta sas aeras,
torren nettas, cun atteru lugore,
attinde de s'amore cuss'anelu;
risos e giogu, tribàgliu e suore,
su riu prenu, cun undas lieras,
e de tramas de oro s'arcu 'e chelu.

Torret sa lughe de sa libertade,
torren, allegras, cuddas serenadas,
e sas pasturas sian semenadas,
de ranos santos, riccos de amistade.

07 giugno 2012

Nuoro 2012 - Tema proposto: "Sa crisi"
Terza classificata al concorso di poesia in lingua sarda "San Giovanni Battista"