E naran chi s’istoria est mastra ’e vida,
ma non sun totus a nde ogare insinzu
si de sos fatos mancat sa medida
e vanu in sa cumpresa est donzi allinzu,
ca cando s’imbasciada no est retzida
de mezoru non s’idet s’arveschinzu.
S’ignorantzia ’e s’istoria est che cundanna
chi tancada muntenet onzi janna.

Chin su giudisciu solu ’e s’aparentzia,
pro custa immigratzione in movimentu
bi nd’at chi betan puru sa sententzia
chi a totu custa zente ’e malassentu
dare non lis devimus acuglientzia
ca abbastare non podet su sustentu.
E ca mancat a nois puru su tribagliu,
s’acuglientzia resultat un’isbagliu.

Ma chie de s’istoria at connoschentzia
ischit chi dae remota antighidade
originada est sa nostra erentzia
dae populos de onzi calidade
acudidos dae onzi provenientzia
ispintos dae bisonzu o avididade,
e nàrrere si podet chen’azardu
chi fromma an dadu a su pópulu sardu.

Pópulu nostru fatu d’emigrados
ispàrghidos in donzi continente
chi dae Sardigna si nde sun andados
chin animu e chin coro suferente
dae sa netzessidade obbligados,
ma chin sa patria issoro sempre in mente,
e chi partidos sun pro su bisonzu
est sa realtade e no est naronzu.

E non b’at pópulu in tota sa terra
chi de cust’abba no apat bufadu
e fuende dae fàmine o dae gherra
dae logu sou non siat emigradu
girende onzi campura e donzi serra
finas chi zassu bonu at agatadu,
chin sas familias puru in movimentu
ca brivas fin de su sustentamentu.

Guvernantes chi muros sun pesende
o chi sos muros los cheren in mare
pro ignorantzia non sun cunsiderende
chi sos pópulos non podes frimmare,
ca si bisonzu los est ispinghende
muru non b’at chi non potan brincare.
Arrere podes s’invasore armadu,
ma non frimmas chie est disisperadu.