Dae gurgos iscuros
chena vormas e sinnos
moven pessos neulosos
allambritas umbras
chi disizosas pundan
a s'erva 'e sa tanca
uve pasan biancas
chena erru e cuile
paraulas ìnnitas
d'anticu parile.
In su jocu 'e s'attoppu
su pundu e su tumbu
pesan tundu su ballu
chin affranzos caentes
inturtos arcanos
de tramas e bramas
chi abiles manos
ischertan e sestan
iffretzin e cosin
intretzin e tessen
s'arrezen e rezen
criatura in s'imboza
de paraulas pùriles
ch'isvelan sas formas
cuatas ma vias
in su burgu prus burgu
de s'anima mia.........
E naschit Poesia.

Gurgos: profondità
Allambritas: bramose, avide
Pundan: tendono
Erru: l'insieme dei campanacci di un gregge
Parile: razza, specie
Attoppu: incontro, appuntamento
Pundu: paura
Tumbu: contatto
Inturtos: impasti
Iffretzin: imbastiscono
Rezen : reggono, contengono
Imboza: striscia di lino per fasciare i neonati

Menzione d'Onore Sezione B - Concorso di poesia in Lingua Sarda “Sant’Antoni de su o’u” - Mamoiada 19 Dicembre 2021