E Sònnio ancora
di Pinuccio Giudice Marras

Mundos de oro e casteddos fadados
sònnio ancora in nottes de reposu;
e in su sonnu m'incanto chin gosu
de fronte a tanta arcana immensidade.
Torrende puru insegus chin s'edade
a sos beranos mios barigados.

M' 'enin in sonnos cussorzas froridas
e campiles de tancas laoradas.
Nottes de luna, aèras isteddadas;
e chentales chin prellas de lentore,
chi m'allughen su coro 'e bonumore
attesu dae penas accanidas.

Dae custos ammàjos chi mi chinghen,
mai nde dia cherrer esser fora.
Ma medas bortas sa noa aurora
m'ischidat; e cuadros diferentes,
no mi dan tzertu immazines rièntes
chin feas reartades chi dipinghen.

Como tra tempos mios chi tramontan
ue sos menzus bisos isvanession,
mi curren pessos, chi filos intessin
d'afficos istantios chi s'oscuran.
Eppuru in parte ancora m'asseguran
carchi dirvagu in valores chi contan.

E ando e chirco dies d'assulenu,
allàrgu da' inzomos de anneu.
Piùs de una 'orta imploro a Deu
pro chi s'arcu 'e sa vida no m'annùet;
dendemi puru, in su 'entu chi mùet,
de sa natura su càntigu amenu.

E sigo andare, in bramas chi mi nìnnen,
bisende fintzas a ogros abbertos,
pro eh' 'ida logos sanos, chena chertos,
ne delittos, ne gherras disumanas,
ma zente in gosu e paghe; uè campanas
chin toccos d'allegria sempre tìnnen!!

(Macomer)

Terza classificata al Concorso di Poesia in Limba Sarda di Tissi - 2008