Céli chena sòli
néuli imbuffati di ràbbia
l’aria pisùta di dulòri.
Balcòni chjusi e pultòni sghinti
né ghjochi di stéddhi pa li carréri
né boli di rùndini ill’aria
allegraràani la dì.
La notti bugghja chena luna e stelli
chena sonnu pa pudè sunnià.
Solu un licéri trimulà di candeli
siccutti tra un rusarià e l’altu
curòni di fiòri chena prufumu.
S’è filmatu lu tempu
su occhj chjusi pa sempri
su un còri chi no batti più.
È lu mumentu di l’alcanu passagghju
undi demu pacà lu dèbitu a la ‘ita.
Ca venaràa a incassallu?
Ca riscattaràa l’anima nostra?
Saremu cundannati a drummì pa sempri?
O s’accendaràa l’allucchittata
chi occhj noi daràa a lu licèri sùffiu
e ali pa pudè bulà?
Briddhàràani insembi sòli, luna e stelli
sbocciaràani fiòri da folti profumi
in ciàldini chi mai sfiurarani,
meludìi d’agnuli allegraràani eterni paradisi
undi l’animi s’abbracciaràani
di puru e suberanu amòri.
E sarà luci …chena fini.

2º Classificata Sezione Versi liberi - Premio Peppinu Mereu 2015