E torran a atitare
di Antoni Piras

Kabul, 17-09-2009
Herat, 28-07-2010

E torran a atitare
cuddas mamas in pena,
samben in terr’anzena
b’at ancora!

Sa sorte traitora
b’at postu sas farrancas,
isterrid’at sas brancas
su malignu.

Contr’a malu disignu
remediu non b’ada,
contr’a sa Peilada*
no’ binchides!

Mamas chi sucutides
po custa marturia,
cun fortza sa traschia
afrontedas.

Babbos, no’ pianghedas,
poderàdebos forte
ca cun sa malasorte
oe gherrades.

Bois, sorres e frades,
muzeres e isposas,
imprentade sas losas
de amore.

Criatura minore
ch’as connotu su lutu
sa die chi ch’est rutu
babbu tou…

chi su coragiu sou
ti fetat crescher sanu
e ti sien lontanu
sos infados.

Como, asseliados,
in cussos altos chelos
in paghe lassadèlos
reposare!

E torran a atitare…!

*sa morte