Umbras e illampizzadas
curren a manu tenta
truvande tazos de muvras de prata
chi in pittu ‘e monte paschene sas nues.
S’ierru avantat
dae sa carrera ‘e susu;
totu est a tremulìa
comente chi sa morte
s’incunza sua irvetet:
soledade innantis
soledade issegus.
Pagos si pompian a intundu
pagos bisan
medinde sa ‘ortaedie
a tasseddas de aspru cannonadu
e passos lestros de crogas purposas
in custu fromigarzu
de carres chi s’anima an perdidu.

Unu ‘etzu pranghet
un’amentu in sa terra ingalenadu
e chircat sas istimas
sas raighinas chircat
dae janna in janna andande
in cherta ‘e cuddos nuscos
de presessias connotas
foghiles d’amistade
chi nos limpiene s’anima imbriagada
dae dillirios de vida chene vida.
Povera ‘idda mia
ue solu s’irvaliu paret bonu
ue solu s’irvaliu paret bellu.

A banda in mesu ‘e zente
sigo sonnios reverdes
iscriendelos a literas nieddas
in sa cara bianca ‘e su computer
chi mastrigat e irmartit
totu sos malos pessos…

…e mi rendo che a totu
a s’eclisse ‘e miradas e paraulas
dae sos tempos noales decretada.

1° Premiu Setzione B “Premiu ‘e poesia sarda Santu Mauru” Sorgono 2014